This post is also available in: English (الإنجليزية)
نظرة للماضي
سنين عجاف مرت على السوق التجاري حولنا، على التصدير والاستيراد، شهور مضت على تأخير شحنات، و ضياع رقم ذاك المورّد اللي تعود صاحب البقالة على توريد بضاعته منه..
مضت سنين! على طرق تقليدية و غير مبتكرة في شراء بضائع الجملة، غرقنا بين المورّدين والمستودعات
سنوات طويلة مرت على مجتمعنا السعودي التجاري، لين بدت النهضة، ارتقت المتاجر، انتشرت التقنية ودخلت للسوق. من الوسط التجاري العتيق وطريقته القديمة في البيع والشراء خرج لنا ساري، نهض عشان يصحح مبادئ تجارية خاطئة، ويقوّم أعمدة التجارة الناجحة، طلع لنا ساري عشان يكون رمز فخر لكونه أول مشروع سعودي يستخدم التقنية الحديثة للربط بين المورّدين والمستخدمين. وُجد ساري ليبدأ مرحلة جديدة يسطرها تاريخنا التجاري السعودي الناجح.
لمحة
طيب وش يعني ساري ؟ تسمية ساري مرت بمراحل كثير عشان نتأكد ان الاسم سلس و مرن، فأخذ مؤسسي ساري وقت طويل عشان يوصلون للنتيجة. في المرحلة الأولى اعتمدوا في البحث عن الاسم المناسب على معايير تكون عملية بحيث يكون الإسم قصير وسهل النطق لجميع اللغات. و من أهم المعايير بعد؛ أن كلمات البحث المفتاحية للإسم ما تودي الباحث لعلامات تجارية ثانية. في المرحلة الثانية البحث عن اسم مميز وفريد، والحصول على اسم يمثّل الحركة والاستدامة عندنا كشركة تقنية لوجستية؛ بعدنا عن أي مسمى مرتبط بكماليات القطاع مثل: كرتون، طبلية، صندوق،… وغيرها خصوصًا اذا بدينا نتخيل دورنا بعد عشر سنوات ووش ممكن يتغير خلالها. رسينا على مسمى سيار قلبناها يمين ويسار، سرينا مع اصدقائنا وأبحرنا بالخيال لين وصلنا للمرحلة الأخيرة واعتمدنا ساري.
بدت ساري عام 2018، ومثلها مثل أي شركة في بداياتها كانت شركة تقنية تخدم المستفيدين الي حولها، و ما مر وقت طويل إلا وقدرت ساري توقف بثقة، وقدرت توصل لمورّدي الجملة، وصبّت تركيزها كله على الشركات المورّدة والمستهلكين. هذا النجاح ما كان بين يوم وليلة، ولا كان مثل شربة الموية، كانت ساري ولا زالت تواجه الكثير من العقبات في طريقها، منها انسحاب بعض الشركات المورّدة من السوق، تأخير تجاوب الشركات معها، ضعف الموارد في بداياتها، والكثير من العقبات الي وقفت في وجه نجاح ساري. بعض العقبات تعيق لدرجة التفكير في الانسحاب او فقدان الشغف للوصول للي تبيه، لكن ساري قدرت انها تجعل من العقبة دفعة للأمام ووسيلة للوصول للغاية
كان التمويل أحد التحديات إلي واجهت ساري بالبداية، أخذ الموضوع حوالي 12 شهر من بداية التأسيس لين قدرت تكسب أول استثمار خارجي، وهذا أكيد كان يحتاج تمويل ذاتي مع المحافظة على الموازنة بين نمو الشركة والاستقرار الأسري المادي للمؤسسين.
في البدايات محمد وخالد مؤسسين ساري، ما كان معهم أحد من الفريق الحالي، وهذا الوضع كان من أصعب المواقف الي واجهتهم، كيف نبدأ؟ مافيه يدين تساعدنا! مافيه فريق! كل الفريق كان شخصين بس. لكن من صالح ساري ان خبراتهم في المجال الاداري ساعدتهم كثير في السيطرة على الوضع وإدارته، وبدوا يشكلون فريقهم حتى صاروا من شخصين إلى أكثر من حوالي 60 موظف وموظفة
قصة نجاح
في الفترة الأخيرة كثرت المشاريع التجارية في السوق السعودي، لكن مو كلها قدرت تكمل مشوارها التجاري بنجاح، كثير منهم بعد فترة اختفى اسمه من السوق، او حوّل مجال آخر يجرب فيه مهاراته المتخبطة.
وصرنا قليل نسمع قصص نجاح خصوصًا في مجال التجارة الإلكترونية بقطاع الأعمال بالمنطقة، فصار على عاتق ساري مو بس إنجاح المشروع بل رفع الوعي حول مؤشرات القطاع، حجمه، ومعايير الأداء المهمة.
كون فكرة ساري، مبتكرة وجديدة على السوق راهن في بداياتها الكثيرين على فشلها واستحالة نجاحها والاقبال عليها، لأنها تعمل على (رقمنة) تطبيق تقنيات التحول الرقمي والانتقال بالخدمات الي تقدمها القطاعات الحكومية إلى نموذج عمل مبتكر يعتمد على التقنيات الرقمية، مبتعدة عن الازدحام البشري الي صار سبب فساد كثير من القطاعات. لكن بعد فترة أثبتت ساري العكس تمامًا بنجاحها.
وسط مجتمع تجاري تقليدي، كان جدًا صعب إثبات جودة فكرة ساري، فمن اليوم الأول كانت فكرة مؤسسي ساري في بناء شركة بهيكل نشيط وأصول خفيفة، بمعنى انها ما تبي تعتمد على الاستثمار بشكل تقليدي في المستودعات والتريلات بل على رقمنة القطاع. مع التطور الحديث والتقدم التقني صارت هذي الفكرة بديهية لكن كانت صعبة الاستيعاب على تجار الجملة الاعتياديين، خصوصًا في قطاع تعود على نمط تجاري معين خلال فترة طويلة، كانت الفكرة ثقيلة على اللي تعودوا طوال ممارستهم في المجال على رؤية منتجات محسوسة وعلاقات واقعية بين مقدمي الخدمة والمستفيدين.
بعد عامين، المراهنة الي حطوها فريق ساري على النموذج التشغيلي المرن شافوا نتيجتها على أرض الواقع، وصار النجاح حقيقة، وهذا بفضل تأثير العلاقات الي ساعدت الشركة على التوسع بشكل سريع وبتكلفة أقل.
مهما كانت العقبات الي واجهت أو بتواجه ساري بالمستقبل، ساري وضعت أساس ثابت ومُحكم ومستعد يواجه أي شيء، مثل الاعتماد على التقنيات الحديثة ومواكبة التطور لأن البقاء على نفس الخطوة ونفس المكان سنين طويلة ممكن يجبرك بعد فترة على الانسحاب، التغيير للأفضل يصنع منك شيء مختلف ومتفرد بذاتك عن غيرك من المنافسين.
